Programa1384

Podcast de Corcovadomusica

Edición número 1384 de O Recanto do Corcovado. Puidestes escoitala o venres 1 de decembro a través de RKV Radio Vigo, e o sábado 2 na sintonía de Cuac FM A Coruña e da Radio Municipal de Redondela. Pechamos a rolda de emisións o mércores 6 de decembro a través de Radio Crónica Folk Musical. No programa desta semana dámoslle minutos ás Leilía, quen logo de preto de catro décadas, veñen de anunciar a súa despedida co proxecto “Anque me vou non me vou”. O xoves 7 de xaneiro (que non de decembro, ollo a este dato) recalarán no Teatro Colón da Coruña antes da súa despedida final, o 13 de xaneiro no Auditorio de Galicia, en Compostela. Da despedida saltaremos a novos comezos, os de Guadi Galego e Sofía Espiñeira. Guadi vén de presentar o proxecto “Síntese Horizonte”, que botará a andar o vindeiro 26 de xaneiro no Teatro Principal de Compostela. Sofía Espiñeira, pola súa banda, comparte connosco o primeiro adianto do seu novo disco, “Xeografías”. Trátase dunha peza íntima, física e reflexiva. Levamos anos á espera do novo disco de Espiñeira, así que tomamos este feito como unha das grandes novas do final do ano. Vouvos presentar, ademais, o segundo sinxelo de “Fado Camões”, o novo disco da portuguesa Lina. Gravouno coa colaboración de Rodrigo Cuevas. Completaremos o programa con Carles Dénia, Nastasia Zürcher, Xoel López, Loiros e Alberto Vilas. Lembrade que este último presentará o seu novo disco, “Once cancións e unha danza”, o vindeiro sábado 9 de decembro no Multiusos da Xunqueira de Redondela.